PANTOMIMË ME SKENAR
Qëllimi: Nxënësit të mundohen të gjejnë veprimet që luhen në çdo akt të shfaqjes.
Materiale të nevojshme: Karta të vogla “Pantomimë me Skenar“, secila kartë përmban nga një hap të një sekuence veprimesh. (Kartat duhet të shënjohen në atë mënyrë që të dallohen pesë kartat e një sekuence të njëjtë dhe kjo e bën më të lehtë identifikimin dhe kthimin e tyre prapë në grumbull. P.sh kartat e lidhura me një sekuencë kanë nga një pikë të kuqe).
Çdo set i kartave është pjesë e një seti tjetër më të madh, mirëpo duhet të përdoret vetëm nga një set me radhë.
Udhëzime hap pas hapi
- Vetëm një grup luan i pari; pjesa tjetër e klasës janë spektatorë.
- Mësimdhënësi mban një set me pesë karta në dorë, të kthyera me fytyrë poshtë. Anëtarët e grupit, një nga një, tërheqin nga një kartë.
- Nxënësit interpretojnë çfarë shkruan në kartë përmes gjesteve apo duke e lexuar me zë. Për shembull, nëse në kartë shkruan ‘’ hidheni në kuti’’, nxënësi mund të bëjë këtë veprim.
- Spektatorët duhet të përpiqen të qëllojnë se çfarë do të thotë veprimi. Nëse e qëllojnë që nënkupton ‘’postoj një letër’’, ata duhet të qëllojnë se ku ndodhet ky hap në sekuencën e veprimeve. Atyre u lejohet vetëm një mundësi për të qëlluar. Nëse përgjigja e tyre është e pasaktë, personi tjetër në radhe vazhdon me kartën e tij.
- Kur spektatorët arrijnë të qëllojnë aktivitetin e plotë, anëtarët e mbetur në grup duhet t’i hapin dhe t’i prezantojnë kartat e tyre. Spektatorët ende vazhdojnë të përpiqen që të vendosin të gjitha veprimet e vogla në një sekuencë të plotë.
- I ftoni nxënësit që të qëllojnë titullin e saktë të veprimeve siç janë të shkruara në karta.
Shembull: (supozojmë që kartat janë tërhequr në këtë formë)
Karta 1: paloseni me kujdes (veprimi i tretë në sekuencë)
Karta 2: vuloseni (veprimi i katërt)
Karta 3: shkruani me kujdes dhe pastër (veprimi i parë)
Karta 4: hidheni në kuti (veprimi i pestë)
Karta 5: lëpijeni dhe mbylleni (veprimi i dytë)
TITULLI I AKTIT: Postimi i letrës
Shënim për Edukatorin: Mund të imagjinoni se sa të çrregullta janë këto veprime për nxënësit që nuk e dinë renditjen dhe titullin e saktë. Kur veprimet prezantohen kështu të ‘’çrregullta’’ dhe fjalët duken të pakuptimta, loja shndërrohet në një aktivitet që kërkon zgjidhje të problemit dhe renditje të saktë. Formësimi i titullit paraqet aktivitetin përmbyllës; vetëm mësimdhënësi e di titullin e ‘’vërtetë’’ .