Më poshtë gjeni 3 aktivitete që ju shërben në realizimin e orës: Numri 2. Përgatitje përpara fillimit të sesionit:
  • Lexim dhe përvetësim i aktivitetit në materiale dhe program;
  • Përgatitje e materialeve të nevojshme për aktivitetet që do zhvillohen në klasë;
  • Përgatitje e mjedisit didaktik dhe fizik, si dhe e atmosferës së këndshme dhe bashkëpunuese në klasë.
Ndërlidhja me lëndët e tjera dhe çështjet ndërkurrikulare: Edukatë fizike, sportet dhe shëndeti; Shkathtësi për jetë; Shkencat e  natyrës, Gjuhë shqipe, Edukatë figurative dhe arsimi për zhvillim të qëndrueshëm. Materialet e nevojshme: Fletë të printuara me numrin 2; fletë me ngjyra, lapsa, ngjyra, gota të plastikës, topa të vegjël, tela me push , plastelinë etj. Përshkrimi i aktiviteteve hap pas hapi: Aktiviteti 1: E vërtetë / e pavërtetë Kohëzgjatja: 15 minuta Në fillim, realizohet një aktivitet i shkurtër energjidhënës (shkundja). Në smart TV paraqiten disa fotografi ku shihen: dy duar, dy sy, dy veshë, dy këmbë, etj. Pasi të paraqiten këto fotografi në SMART TV apo ne Letër A3 pyes nxënësit rreth fotografive të paraqitura në smart TV dhe në libër, duke parashtruar pyetje si: Çfarë shihni në ekran? Çfarë po dalloni? Nga sa pjesë përbëhet trupi? Çfarë menduat gjatë shikimit të pjesëve të trupit dhe për çfarë na shërbejnë ato? Pasi të merren përgjigjet e duhura, nxënësit udhëzohen që të mbajnë në duar nga dy objekte, si: dy libra, dy fletore, dy lapsa, dy ngjyra, etj. Aktiviteti 2: Prezantimi i numrit 2 Kohëzgjatja: 15 minuta Në tabelë shkruhet numri 2, duke u treguar nxënësve se sot do të mësojmë për numrin 2. Më pas realizohet aktiviteti i radhës, ku nxënësit, me tela apo plastelinë, formojnë numrin 2 në bankat e tyre. Grupi që e përfundon i pari detyrën, i ngrit lart dy duar. Pastaj, nxënësit në libër shkruajnë dy rreshta me numrin 2.  Në fund të këtij aktiviteti parashtrohen pyetje reflektuese: 
  • Si u ndjetë gjatë punës me numrin 2? 
  • A patët vështirësi? 
  • Sa ju pëlqeu ky aktivitet?
Aktiviteti 3: Duartrokasim kur dëgjojmë numrin Kohëzgjatja: 15 minuta Mësuesja ka përgatitur disa copëza fletësh me ngjyra të ndryshme. Secili nxënës përzgjedh nga një fletëz. Nxënësit pyeten: A mund ta gjeni shokun apo shoqen që ka ngjyrën e njëjtë si ti?  Nxënësit ngrihen në këmbë dhe, duke u bashkuar me shokun ose shoqen që ka të njëjtën ngjyrë, formojnë çifte. Më pas zhvillohet diskutimi me pyetje si: Pse e zgjodhe pikërisht këtë ngjyrë? A të kujton kjo ngjyrë diçka nga natyra? A të pëlqen më shumë kjo ngjyrë për vizatime, rroba apo lodra? Punohet detyra e katërt në libër, ku nxënësit duhet të vendosin në shportën me numrin 1 elementet që janë vetëm, ndërsa në shportën me numrin 2 elementet që janë në dyshe. Kjo detyrë shoqërohet me një aktivitet praktik: Kur nxënësit dëgjojnë numrin 1, duartrokasin një herë. Kur dëgjojnë numrin 2, duartrokasin dy herë.  Në fund, parashtrohen pyetje reflektuese: Çfarë gjërash në jetën e përditshme janë nga dy (çift)? A kemi në klasë dy shokë apo shoqe me emër të njëjtë? Cilët janë ata? Nëse do t’ua shpjegoje dikujt tjetër numrin 2, çfarë shembulli do të përdorje?