Më poshtë gjeni 3 aktivitete që ju shërben në realizimin e orës: Barazi për të gjithë. Përgatitje përpara fillimit të sesionit:
  • Lexim dhe përvetësim i aktivitetit në materiale dhe program;
  • Përgatitje e materialeve të nevojshme për aktivitetet që do zhvillohen në klasë;
  • Përgatitje e mjedisit didaktik dhe fizik, si dhe e atmosferës së këndshme dhe bashkëpunuese në klasë.
Ndërlidhja me lëndët e tjera dhe çështjet ndërkurrikulare: Gjuhë shqipe; Matematikë; Njeriu dhe natyra; Edukatë figurative; Shkathtësi për jetë edhe Arsimi për zhvillim të qëndrueshëm. Materialet e nevojshme: Libri – Shoqëria dhe mjedisi 4; Kushtetuta për fëmijë; Rregullorja e klasës; Histori të shkurtra nga jeta reale e fëmijëve; Hamer; Tabela; Fletë të bardha A4; Makër; Lapsi; Stilolapsi; Goma; Lodra; Shkumësi; Shpuza; Izolues; Vizorja; Letra me ngjyrë, Plastelinë Përshkrimi i aktiviteteve hap pas hapi: Aktiviteti 1: Barazi për të gjithë Kohëzgjatja: 15 minuta Në fillim të orës, mësimdhënësja krijon një atmosferë pozitive në klasë duke u bërë komplimente nxënësve: sot dukeni të gëzuar, të hareshëm. Kjo i nxit të jenë të përqendruar në mësim dhe i njofton se gjatë kësaj ore do të mësojmë për njësinë mësimore: Barazi për të gjithë. Edukatorja kontrollon dhe vlerëson njohuritë dhe përvojat e deritashme të nxënësve për barazinë, duke bashkëbiseduar me anë të pyetjeve:
  • Çfarë është barazia? 
  • A të ka ndodhur ndonjëherë të ndihesh i/e trajtuar ndryshe? Si u ndjeve? 
  • A ke parë ndonjëherë që dikush tjetër të trajtohet padrejtësisht? Çfarë do të thotë për ty “të jesh i/e barabartë”? 
  • Si ndjehesh kur të gjithë trajtohen njësoj në klasë? 
  • A mendon se djemtë dhe vajzat duhet të kenë të njëjtat mundësi? Pse? 
Mësimdhënësja i dëgjon përgjigjet e nxënësve dhe i nxit të gjithë të marrin pjesë në bashkëbisedim. Pasi të ketë marrë përgjigjiet nga nxënësit dhe të ketë dhënë një përfundim, kërkon nga nxënësit që të hapin librin Shoqëria dhe mjedisi 4, në faqet 34-35. U kërkon të shikojnë situatat 1 dhe 2, të përqendrohen në kuptimin e tyre dhe të analizojnë konceptin e barazisë. Më pas mësimdhënësja vendos hamerin në dërrasën e zezë ku janë të shkruar shembuj të barazisë dhe të pabarazisë dhe kërkon nga një nxënëse të lexojë shembujt e barazisë dhe një nxënës të lexojë shembujt e pabarazisë, pastaj shpjegon njësinë mësimore.  Pas leximit të shembujve të barazisë dhe pabarazisë dhe shpjegimit të njësisë, mësimdhënësja kërkon nga nxënësit të luajnë lojën “Detyrat e pabarabarta”.  Mësimdhënësja përshkruan lojën dhe i ndan nxënësit në 4 grupe, secili me nga 5 nxënës. Çdo grup merr një detyrë: Grupi i parë: të vizatojë një shtëpi; Grupi i dytë: të ndërtojë diçka nga letra; Grupi i tretë: të punojë një figurë nga plastelina; Grupi i katërt: të shkruajë një fjali për barazinë. Por grupeve u jepen mjete (materiale) të ndryshme: Grupi i parë merr shumë materiale; Grupi i dytë merr pak më pak materiale se grupi i parë; Grupi i tretë merr shumë pak materiale; Grupi i katërt nuk merr aspak materiale. Pas 3 minutash, të gjitha grupet diskutojnë për materialet e pranuara. Diskutimi zhvillohet me anë të pyetjeve: Si u ndjetë gjatë lojës?; A ishte e drejtë që disa kishin më shumë mjete?; Çfarë kuptoni nga kjo për barazinë?; Çka do të mësoj nga barazia për të gjithë? Dhe si u ndjeve kur isha duke mësuar për barazinë për të gjithë? Aktiviteti 2: Pema e barazisë Kohëzgjatja: 30 minuta Më qëllim të përforcimit të njohurive të marra gjatë orës mësimore, mësuesja i angazhon nxënësit të luajnë lojën “Pema e barazisë”. Në këtë lojë, kërkohet që të gjithë nxënësit të shkruajnë nga një fjali për barazinë për të gjithë në një gjethe dhe t’i vendosin gjethet në pemën e vizatuar në hamer. Pasi secili nxënës të ketë vendosur fjalën për barazinë, mësimdhënësja bën një reflektim me anë të pyetjeve: Pse duhet të mësoj për barazinë për të gjithë? Çfarë kuptimi ka mësimi për mua? Aktiviteti 3: Shtypja në veprim - Lëvizja e karrigeve Kohëzgjatja: 10 minuta Mësimdhënësja i ndan nxënësit në 4 grupe dhe u jep role të ndryshme për të vepruar në situata që ndihmojnë ruajtjen e barazisë dhe përfshirjes së të gjithëve:  Grupi 1: Si do t’i ndihmonin një nxënësi të verbër që kërkon ndihmë. Grupi 2: Si do t’i ndihmonin një vajze që dëshiron të luajë futboll me djemtë.  Grupi 3: Si do t’i ndihmonin një djali që dëshiron të bëjë punë të kuzhinës dhe t’i ndihmojë nënës së tij. Grupi 4: Si do t’i ndihmonin një nxënës të ri që nuk njihet mirë nga të tjerët.  Secili grup diskuton dhe më pas tregon mënyrën e ndihmës që do t’u ofronte, duke theksuar barazinë dhe përfshirjen. Pasi të gjithë grupet të kenë prezantuar idetë e tyre mësimdhënësja i plotëson kur ka nevojë dhe jep një përmbledhje duke vazhduar me përfundimin e orës mësimore me anë të pyetjeve reflektuese: 
  • Si jeni ndjerë gjatë orës mësimore? 
  • Çfarë mësova sot për barazinë? 
  • Cili ishte momenti më i rëndësishëm për mua në këtë orë? 
  • Si tregova barazi sot? 
  • Si mund të përdor njohuritë e sotme në jetën time të përditshme?
  • Pse është e rëndësishme të tregojmë respekt për të gjithë? 
  • Si ndihmon barazia për të ndërtuar një mjedis të mirë për të gjithë?