Më poshtë gjeni 3 aktivitete që ju shërbejnë në realizimin e orës mësimore: Fantastic food / Popular food in the UK Përgatitje përpara fillimit të sesionit:
  • Lexim dhe përvetësim i njësisë mësimore në materiale dhe program;
  • Përgatitje e materialeve të nevojshme për aktivitetet që do zhvillohen në klasë;
  • Përgatitje e mjedisit didaktik dhe fizik, si dhe e atmosferës së këndshme dhe bashkëpunuese në klasë.
Ndërlidhja me lëndët e tjera dhe çështjet ndërkurrikulare: Gjuhë shqipe dhe gjeografi, Biologji  Materialet e nevojshme: Libri i Nxënësit kl 8, Libri i Mësuesit, Interneti, Laptopi, Tabela, Fletë letre, Markerë, Litar, Fletë të printuara me ushqime Përshkrimi i aktiviteteve hap pas hapi: Aktiviteti 1: Gatimet e famshme E filloj mësimin duke u kërkuar nxënësve të mbyllin librat. U kërkoj të japin ide mbi shembuj të gatimeve të famshme nga Mbretëria e Bashkuar. Nxjerr sugjerime dhe i shkruaj në dërrasë. Më pas, me fjalët që kam shkruar në dërrasë, zhvillojmë aktivitetin “Kape gishtin”. Aktivitetin do ta realizojmë në fillim të orës për t’u siguruar që nxënësit e fillojnë me energji pozitive (së bashku me nxënësit formojmë një rreth dhe përdorim fjalët që lidhen me ushqimin, të cilat paraprakisht i kemi shënuar në tabelë, si p.sh. spicy, curry, hot dog, pizza, etj. – grab the finger).   Aktiviteti 2: Ushqimi më i famshëm në Mbretërinë e Bashkuar U bëj nxënësve pyetjen: "Cili ushqim mendoni se është i famshëm në Mbretërinë e Bashkuar?" I përqendroj në shembujt në tabelë dhe nxjerr nëse mendojnë që ato përfshijnë ushqimet më të njohura. U tregoj se gjatë mësimit do të mësojnë më shumë për këtë temë. Më pas, u kërkoj të hapin librat dhe të përshkruajnë fotografinë; i pyes se nga mendojnë se vjen fillimisht ky ushqim. Pas diskutimit, u them që do të ndahemi në grupe duke përdorur metodën “Radha e ditëlindjes” (nxënësit rreshtohen sipas muajve të lindjes pa folur me njëri-tjetrin, duke e kthyer këtë proces edhe në argëtim, pasi mund të bëjnë gabime në radhitje). Pasi të ndajmë grupet, fillojmë menjëherë me diskutimin e pyetjeve në ushtrimet 2 dhe 3. Në fund, dëgjojmë një audio, ndërsa nxënësit lexojnë artikullin për të kontrolluar idetë që kanë diskutuar më herët.   Aktiviteti 3: Llojet e ushqimit Klasën e ndaj në katër pjesë me një litar dhe në secilën pjesë vendos fleta të printuara me ushqime, si p.sh. “Traditional Albanian food”, “UK food”, “American food” dhe “Indian food”. Të gjithë nxënësit pozicionohen tek ushqimet që ju pëlqejnë dhe pastaj japin arsyetimin për zgjedhjen e tyre. Me këtë aktivitet realizojmë njëkohësisht diskutim dhe argëtim. Gjithashtu, në këtë aktivitet përfshij edhe fazat e “Ciklit të Kolbit”, duke vijuar me pyetjet: Çfarë mendonit ndërkohë që u pozicionuat tek lloji i caktuar i ushqimit? Çfarë na nevojiten këto njohuri? Ku mund t’i zbatojmë këto njohuri?  Pastaj, vazhdojmë me ushtrimet 4 dhe 5, ku nxënësit do të shikojnë një video. Fillimisht, shohim pjesën e parë dhe përgjigjemi në pyetje; më pas, shohim pjesën e dytë dhe diskutojmë.  Në fund, në dyshe, diskutojmë për ushqimin në vendin tonë dhe gjithashtu do të provojmë disa nga ushqimet tona tradicionale.  Në këtë mënyrë, mendoj që është realizuar “Piramida e të nxënit” duke përfshirë: 50% diskutim, 75% demonstrim dhe 95% të nxënit përmes përvojës.