Më poshtë gjeni 3 aktivitete që ju shërben në realizimin e orës/aktivitetit: Frutat e stinës. Përgatitje përpara fillimit të sesionit:
  • Lexim dhe përvetësim i aktivitetit në materiale dhe program;
  • Përgatitje e materialeve të nevojshme për aktivitetet që do zhvillohen në klasë;
  • Përgatitje e mjedisit didaktik dhe fizik, si dhe e atmosferës së këndshme dhe bashkëpunuese në klasë.
Ndërlidhja me lëndët e tjera dhe çështjet ndërkurrikulare: Gjuhë dhe komunikim, Matematikë. Materialet e nevojshme: Foto të ndryshme, fruta, petë të ëmbëlsirës, pjata, piruna, qokollatë Përshkrimi i aktiviteteve hap pas hapi: Aktiviteti 1: Karakteristikat e stinës së pranverës Kohëzgjatja: 10 minuta Ditën e fillojmë duke u ulur në rreth së bashku me të gjithë nxënësit. Edukatorja i njofton nxënësit se sot do të flasin për stinën e pranverës dhe paraqet para nxënësve një foto për stinën e pranverës dhe e komenton. Pranvera është një stinë shumë e bukur. Ajo vjen pas dimrit dhe sjell me vete ngrohtësi dhe gëzim. Është stinë ku gjithçka fillon të lulëzojë, ngjyrat kthehen në natyrë dhe moti bëhet më i ngrohtë. Stinën e pranverës e bëjnë më të veçantë karakteristikat si: lulet lulëzojnë, bari merr ngjyrë të gjelbër, ardhja e dallëndyshes që ndërton folenë, pemët lulëzojnë, dëgjohen cicërimat e zogjve, bletët dhe fluturat fluturojnë nga një lule në tjetrën, ylberi që del pas shiut, ndryshimi i veshjeve dhe piqen frutat. Edukatorja fillon me pyetje si:
  • A ju pëlqen stina e pranverës? 
  • Çka ju pëlqen më shumë në stinën e pranverës?
Pasi të përgjigjen nxënësit, edukatorja përmbledh diskutimin ku secili nxënës tregon diçka të veçantë që i pëlqen nga stina e pranverës. Aktiviteti 2: Frutat Kohëzgjatja: 15 minuta Edukatorja fillon të flasë për frutat, duke shpjeguar se ato janë shumë të shijshme dhe të mira për shëndetin e nxënësve. Frutat janë dhurata të bukura nga natyra; ato janë të ëmbla dhe shumë të shëndetshme për trupin. Ajo paraqet fotografi të ndryshme frutash dhe i komenton. Janë shumë lloje frutash si: mollë, banane, rrush, dardhë, luleshtrydhe, boronicë, mjedra, portokall, mandarinë, kivi, kumbulla, pjeshka, qershi, duda etj. Edukatorja shpjegon se kur hamë fruta, nxënësit marrin shumë vitamina që ndihmojnë trupin të mos sëmuret dhe të rritet mirë. Frutat japin energji për të luajtur dhe për të mësuar gjëra të reja. Prandaj është shumë e rëndësishme të hamë fruta çdo ditë dhe të kujdesemi për shëndetin tonë. Pasi të ndaj këto informata, edukatorja vazhdon me pyetje si: Cilat fruta ju pëlqejnë më shumë?; A keni fruta në kopsht? Frutat e stinës  Edukatorja vazhdon duke folur për frutat që piqen në pranverë. Ajo paraqet fotografi të qershisë, boronicës, dudës, mjedrës, kajsive të hershme dhe luleshtrydhes dhe i komenton. Qershia: është një frut i ëmbël; kur piqet merr ngjyrë të kuqe. Brenda qershisë ka një bërthamë të vogël.  Boronica: është e vogël, rrumbullakët dhe me ngjyrë blu të errët, ka shije të ëmbël dhe pak të thartë. Ndihmon përforcimin e imunitetit dhe kujtesës.  Dudi: rritet në pemën e quajtur dud. Ka disa lloje: të kuq, të zi dhe të bardhë, të gjitha me shije të ëmbël.  Mjedra: është e vogël, e përplot me shije dhe vitamina, një thesar për shëndetin.  Kajsitë e hershme: të pasura me vitamina, zakonisht përdoren për reçel dhe komposto.  Luleshtrydhja: e vogël, e kuqe dhe shumë e ëmbël, me plot vitamina, ndihmon trupin të rritet i fortë. Edukatorja kërkon nga nxënësit t’i shijojnë disa luleshtrydhe dhe kajsi dhe të tregojnë shijen e tyre.  Pas kësaj, lëshon këngën “Sa i dua frutat”, dhe nxënësit këndojnë së bashku. Aktiviteti 3: Përgatitja e ëmbëlsirës me fruta Kohëzgjatja: 20 minuta                                                                        Edukatorja njofton nxënësit se do të përgatisin një ëmbëlsirë me fruta dhe tregon ecurinë e aktivitetit, ku secili nxënës do të vendos në pjaten e tij një copë tortë, ta zbukuroj me fruta dhe pak qokollatë. Edukatorja paraqet materialet në tavolinë: fruta, pjata, piruna, çokollatë. Pastaj demonstrohet zbukurimi i një ëmbëlsire për ta bërë më të qartë për nxënësit. Të gjithë nxënësit në mënyrë individuale e  zbukurojnë ëmbëlsirën me fruta dhe qokollatë dhe në fund u kërkon ta shijojnë atë.  Edukatorja i përgëzon nxënësit për punën dhe e përfundon aktivitetin duke i pyetur: 
  • Si ndihen sot? 
  • A u pëlqeu ëmbëlsira me fruta? 
  • A do ta përgatisin një ëmbëlsirë të tillë në shtëpi?