Më poshtë gjeni 3 aktivitete që ju shërben në realizimin e orës/aktivitetit: Punimi i folesë së dallëndyshes. Përgatitje përpara fillimit të sesionit:
  • Lexim dhe përvetësim i aktivitetit në materiale dhe program;
  • Përgatitje e materialeve të nevojshme për aktivitetet që do zhvillohen në klasë;
  • Përgatitje e mjedisit didaktik dhe fizik, si dhe e atmosferës së këndshme dhe bashkëpunuese në klasë.
Ndërlidhja me lëndët e tjera dhe çështjet ndërkurrikulare: Gjuhë dhe komunikim, Art figurativ. Materialet e nevojshme: Ngjitës, gërshërë, plastelinë, fleta, penjë, projektori, laptop Përshkrimi i aktiviteteve hap pas hapi: Aktiviteti 1: Karakteristikat e stinës së pranverës Kohëzgjatja: 15 minuta Ditën e fillojmë duke u ulur në rreth së bashku me të gjithë nxënësit. Edukatorja i njofton nxënësit se sot do të flasin për karakteristikat e stinës së pranverës. Edukatorja përshkruan stinën e pranverës duke përmendur disa karakteristika kryesore: ngrohja e motit, lulëzimi i luleve, gjallëria e kafshëve, fluturat, lulëzimi i pemëve, ardhja e zogjve shtegtarë. Edukatorja paraqet një fotografi të stinës së pranverës dhe e komentoi, pastaj vazhdoi me pyetje si: 
  • A ju pëlqen stina e pranverës? 
  • Cilat janë karakteristikat e stinës së pranverës? 
Pas përgjigjeve të nxënësve, bëhet një përmbledhje ku secili nxënës tregon diçka që i pëlqen më shumë nga kjo stinë. Në fund, edukatorja lexon një poezi me titullin “Pranvera”. Aktiviteti 2: Dallëndyshja Kohëzgjatja: 25 minuta Tani do të flasim për dallëndyshen dhe folenë e saj. Edukatorja paraqet disa foto të dallëndyshes dhe folesë me vezë dhe i argumenton. Dallëndyshja është zog shtegtar i vogël, me shpinë të zezë, fytin ngjyrë kafe dhe të bardhë, dhe bisht të gjatë si gërshërë; ndërsa kur fluturon, duken tërësisht të zeza. Dallëndyshja është një zog i bukur që vjen në pranverë. Ajo fluturon shumë dhe ndërton folenë e saj nën çatitë e shtëpive. Foleja është e vogël, e ngrohtë, e ndërtuar prej baltës dhe fijeve të barit, kashtë dhe degëzave të vogla. Foleja është shtëpia e dallëndyshes ku ajo çel vezët dhe rrit zogjtë e vegjël deri sa të jenë gati për fluturim.  Edukatorja vazhdon duke i pyetur nxënësit si: 
  • Keni parë ndonjëherë dallëndyshe? 
  • Ku i ndërtojnë ato foletë? 
  • Me çfarë materiali janë të ndërtuara foletë? 
Pasi të marrin përgjigjet nga nxënësit, edukatorja paraqet me projektor një video të shkurtër për dallëndyshen dhe ndërtimin e folesë. Aktiviteti 3: Punimi i folesë së dallëndyshes Kohëzgjatja: 10 minuta                                                                        Edukatorja i ndan nxënësit në 3 grupe dhe paraqet materialin e nevojshëm si: ngjitës, plastelinë, fleta, gërshërë, penjë dhe shkopinj druri.  Edukatorja cakton detyrat për secilin grup si më poshtë:  Grupi I: ka për detyrë punimin e folesë së dallëndyshes me penjë.  Grupi II: ka për detyrë të punojë vezët me plastelinë të bardhë.  Grupi III: me gërshërë bën prerjen, ngjyrosjen e dallëndyshes dhe prerjen e saj.  Pas punës së grupeve, nxënësit bashkohen për të përfunduar folenë e dallëndyshes. Edukatorja i përgëzon për punën dhe vendos folenë në një kënd të klasës. Edukatorja e përmbylli ditën duke i pyetur nxënësit: 
  • Si kaluat sot? 
  • Çfarë kemi mësuar për folenë e dallëndyshes?